Par fèe ch’la g’abia la giusctu consiscténse, el gréss dal lavóor u déu véss facc la siri prim: féi a techìtt el pan pòss e metìll in d’ona scquéle inséme al lacc.
Truséi e cuarcéi con om quérc o con om féi da plasctiga trascparente. Laghéi posèe tutu la nécc.

El dì dré, primm da scmensèe el sctruus, scpatascéi i amarìtt, scbatii i éu da galìni fresc-ch e preparéi tucc i altri ingredìenn c’a buségne.

Adéss a sì prónn par partii: féi fòro pulito (con ‘na forscelìni o ’m frusctìn) el pasctò da pan e lacc (s’uv paar trép succ sclonghéll con apéne da lacc) fin a fal gnii bél giss.

Péu, metiigh el zucru, l’ughéte, i pignéi (tegnin apéne d’om cò par ingarlandala ala fin), i amarìtt, i éu scbatùi, el cicolat in pólgro e mesc-céi el pasctò con om taréll da len o ‘na scpatra da cusìni.

Metiigh ‘na pónto da sèe, indulssii col zucru vanigliò, la sc-còrso da limón e truséi amò.

Om bòt c’l’è tut ben mesc-ciò, loghéi el pasctò in d’ona fórmo voisgiudu da butér e scpandighéi inzorénn i pignéi c’a vanza, opur ‘na branca da mandorl scbriséi.

Féle chéus in del fórn mighi sc-coténn (atórn a cenvotanta gradi) per ‘na bóno óro. Om bòt finìdi da chéus, tiréle fòro e laséle gnii frégie.

Ète chilé la vòso tórto da pan: om dólz facc cói vanzìtt e cól gusct d’om bòt, prónn pal rasùsct… amò piséi bón s’as rausìss a mighi quedèe sùbut e a lipàl el dì dré.

Collettivo Pasctrugn

Postilla
Ocio a mighi brusèe tut.
g.