La butighi col tof da rasa e polgro

om po’ la disinfete

chel tan starnudèe da maisg

Chel vardèe el ralogi ai set

e peu ai vot e peu ai neu

e innanz iscì fin ai seis

La butighi ‘me ‘na preson

alora tan var butè visch

El scopel, el pianin pai sagom,

i cou da rondon ch’io scapèe

almen lou ch’i pò

Dal ’48 el Pa’ e el Sergio

con ‘na Florett a tirèe ‘m caret

e nèe a tom in la gere

Te sa coisciò ‘me el bochèe di pouri,

u dis un, intan che l’altro

u va a sang

Drizèe listoi e cioi par varnai,

ma pan us e finestri milimetrei,

carezei cola carta da vedro

L’é quasi misdì

Atorn ai dó a vardi el ralogi

intan che i buscai i vara in giir

‘me farfal cioch

A ghé busegn da l’altro cò

par raseghèe ‘m rouro bon

pa l’armadi di tudisch

Da sto cò ag uà pianal:

raseghedusc fin ai canvel

Ié scià i quatro, smensèe quee?

Caicos par doman, om scagn

da frasan coi penol e i tenoi

Disegnel, u dis el pa’

iscì te impara

e te butu vii noto

A ruu i seis e o buto vii noto,

forsi el dì, on altro

gene (tempo di maggio)