Vardal ilé l’Uli, che par l’ultum viagg l’é catò foro el trator. “Ao ch’ l’é ch’ am toco nèe?”. Ig rasponn gnisun e aloro u invii el tratorocchio co’ la manovelecio inrusgiurente. I tusiss tui dui, dal fum. L’Uli u salta su in canotiera, coi banderett dala Parisien piantei sol stomich, ‘me ‘m toor.
Apene prim l’ere al Larice col Remo da Molon, l’Ardo e ‘l Junf, a sughee vinoc, coi maledizioi ai Gomitoli s’ i n’impiosava ‘m got. “Daman amò un”, u fa l’Uli apene prim da i deis da matin.
Ul sugu e peu u meer da colp.
L’é ilé, ch’ u deciid da nee dal gó col tratoor. Ag vegn in menn, u salta su, u pasa foro in Busciarini e u fronto el Signorocc ch’ u traverse i prei. “Oh Signorocc! A pensava propi mighi che te gh’ére”, ug fa.
“Uli, Uli… no le mica parchè non mi hai giammai veduto, se no inciodato a una croce, che no ghe sono davero”.
Ma varda tì che robo, u pense l’Uli, saltandan sgiù dal tratorocc e metendes dré a smargajèe.
“Mi credo che te dovria andar lazzù a l’Infero, no te poso far entrà nel Paradiso, te gà dito robe brute su la gésa e i Santi. E a mi? Poreto inciodaa? Te me ga dito de tuto, a mi e al me Pare, te m’ ha paragonato ale bestie. Va là in fondo, gh’è sta quei come tì, busarde e fanuloni”.
L’Uli u salta su amò pal trator e u s’invii in campagna, e sense gnan saludee chel Signorocc u cridi: “Ho facc ben a ditin da tucc i sort, brut merdon”.
“Maleducat d’un maleducat” u cridi amò pisei el Signorocc, prim da strozzas con la polgro valsada dal tratorenchio da l’Uliocc coi banderet infilsei in do stomich.
In fon ala strada, adoss a l’arginell, i l’ spece tucc quagn e intan i canta. Om Diaurocc ug slongo ‘m tazzin. “Bevetti Ulio, che quirro se face come in de l’altro mondo de prima. Se canta, se maja, se beue, se pianze, se ridolacchia, se caga e se sacramentasse liberi. E nemeno se trabacca”.
L’Uli u salta sgìu amò om bot, u ciapa el tazzin valiiu da barbera, ul sugu e peu u domanda ch’ el l’é ch’ agh guà fee in cambi. “Nientissimo” u rasponn el Diaurocc infeugò.
“Murii l’é miou che viiu, crisctoc”. E aloro l’Uli us met dré a cantèe tan ‘mé prim, se mighi miou, coi altri torlerusc da Prons crapéi d’om pezzon.

gene

14 ottobre 2016

Postilla
Contrariamente, non ci barcameniamo a destra e a sinistra.