Am ragordi amo can ca girava par strada col capel e com am piaséve sentii ‘l ploch ploch da l’aqua in sol’ara, coi gott a roisgio e unu pous a l’altra a dèe sgiù a quatro diit dala fascia. Quai voll al tegneve su an par riparam dal sou, e iscì i faseve altri omon e altri femen, sense che gnisun i obligasa a cuarcièe el lusii di loch, ma iscì, pal piasei. Al tirava sgiù solche in la rivi vers Pasquei, can che la pedalada l’as faseve furiouso e el gust da l’aria la carezava el cò ‘me vin sola lengue. Ho mai pregò, ma a taura al teseve sgiù, pogiandol dal gò, ma in manere da podei sempre videl, an da travers.
An n’ ho perdu paricc tra osterii e a spass e am piaas pensèe ch’i abbia girò el monn so da altri test, miou se mighi d’onscel, an se la podeve mighi vess pisei che ‘na speranza. Da pinin a sere meno spipro, quai voll an vareve an la capusciu col pompon, ma apene la spontava la matoro primivere a tornava indré in de lui, ch’ u podeve vess giall con scricc Parisienne o ross con su Campari, robo ch’ i butava dai machin ch’ i compagnava ‘l Giir. Da grandel, a sem pasò al basch, parché ‘l Che u sere facc videi in la mii viti ‘me ‘m soci personal. Giss, a nava a mità, ma l’ere bele chele stofo pogiada in sola teste ‘me la man da Mam can c’a ghere la feure e a sere orous da schivèe la sc’chere.
Atorn ai vintagn i m’a metù in man el bonet, anzi i bonit: pa’ ‘l prim bot a g’ho mighi volsù ben. Ma apene librò da chele ladrada da dì preziuus che l’é fee ‘l soldaat, o più tajò i loch pa n’ann e am vardava a videi scpontèe da sott n’improbabil bombete a l’inglese. Coi barbisitt da sgiovon tegnui da conn, a pareve el Charlot, ma mighi iscì indezenn come chele pituru ch’ a vedeve in di film intann ch’ la majava calsei o la vardava fissi in di ecc ‘me a dit: a faghi da valtri chel ch’ a vei. Um piaseve mighi el Chaplin e iscì a som pasò a ‘na sfilzi colorada da capusc andin, da cui ch’ i cuarcia an i orecc e che se a i arisut metui su par om para da dì d’astaat a capirisut chel ch’ a vou dii la mordosion.
Om bel momenn a m’ ho trovò dananz a ‘m pensei: o a meteve a post la teste o a meteve a post el capel. A Zuriig, al festival cauntri, ho trovò ‘m capolavoor da capel, da cui c’as veed gnomà in di uestern in teste ai machinisti da locomotiu tot da careisc. Con chele corono in sol cò, o pudù strusèe par vess baloord.
L’é tut pasò, m’ a som mighi malcontenn…
Incheu ch’ a sem nacc foro in stradon col mè bel capel da l’aqua, e a quedava el ploch ploch, u m’a fermò ‘m giandarm ch’ u m’a dicc sense gnan vardam in fascia “dell’entrata in vigore della nuova legge che vieta il portare copricapi sulla testa”.
Can ch’ a g’ho domandò s’an varéve an par lui, dal momenn ch’ u gh’ere su chel d’ordinansa (che mi a meteress mighi su gnan al mè funeral), u m’a raspondù che “lui è nell’esercizio delle sue funzioni e sicché dunque i trovaat l’é miou lasai peerd”.
Intann ch’ a scapava in mezz a l’urizzi, tut strupi, con ‘na man in sol capel par mighi fal varèe vii, o sentiit ‘m tron. Ma l’ere mighi ‘m tron. El colp dala pistolo u m’a ciapò dal gò in la sc’chene e adess a sem chilé butò sgiù coi gott ch’ im fa ploch ploch in sol stomich e in sola fascia. El mè capel l’é al sicuur, sot a la mii man, bon.
A som contenn da veigh avù el tem da viiu la mii viti e chele di mè capei prim ch’ i diventassa malfaben lou e crapò mi.
La podeve nèe peisg.

gene